Налшык щыIэ Сэралъп Мадинэ и Арт-центрым щагъэлъагъуэ художник-дизайнер Битокъу Владислав и «Хранители времени» выставкэр. Ар къызэригъэпэщащ IуэхущIапIэм и унафэщI Сэ- ралъп Мадинэ.

СурэтыщIым и гъэлъэгъуэныгъэм хигъэхьащ Налшык, Тбилиси къалэхэм, Дагъыстэным, Европэм я къалэ зыбжанэм щилъэгъуа псэупIэхэм, ухуэныгъэжьхэм я макет 41-рэ. КъищынэмыщIауэ, графикэ лэжьыгъэхэри утыку кърихьащ. Битокъум къехъулIащ блэкIа илъэсхэм щыIа архитектурэр зэфIигъэувэжын.
- Лэжьыгъэхэм щыдо­лъа­гъу къалэхэм я теплъэм иужь илъэсхэм зэ­хъуэ­кIыныгъэхэр зэрагъуэ­тар. Абыхэм блэкIам драгъэгупсыс икIи зыхыдагъащIэ ди адэжьхэр щыпсэуа, IункIыбзэ зрату щымыта унэ­хэм, дапщэщи зи бжэр зэ­Iуха гъунэгъухэм я унэхэм дызэрыхуэзэшыр, - жиIащ Сэралъп Мадинэ. - Ап­хуэдэ теплъэ зиIэ псэупIэхэм ди нобэрей гъащIэм «къагъэ­зэжыныр» щхьэгъэп­цIэжщ. Къэралым хуэсакъыу ихъумэ архитектурэ фэеплъ нэгъунэ зэрылъэ­лъэжыр ди нэгу щIокI. Жьы хъуауэ къэтлъытэ псори зэрыдгъэкIуэ­ды­жыным зэпымыууэ дыхущIокъу, ди щэнхабзэм щыщ щIэ гуэр тхуэмыухуэми. Абы къыхэкIыу жьым и пIэм щIэ гуэр идгъэувэурэ докIуэкI. Аращ тхыдэм лъэ быдэкIэ дызэрыхэтым ехьэ­лIа щытыкIэ дыщIимыIэри.
Битокъум и лэжьыгъэхэр нэхъыжьхэм иджыри я гум илъ, щIалэгъуалэр зыщы­мы­гъуазэ блэкIам ды­хуэзышэж гупсысэщ. А унэхэм ухашэж къат куэду зэтет уардэунэшхуэм и пэ щыIа, зы унагъуэшхуэм хуэдэу псори зэхуэдэу, зэ­хуэгуапэу зэкIэлъыкIуэу щыпсэуа, Интернетым цIыху­хэр щызэфIимыгъэ­кIуэда зэман дахэм. Художникым лъэщапIэ имы­Iэми, илъэс зыбжанэ и пэкIэ макетхэр гъэхьэ­зы­рыным дихьэхащ.
- Лэжьыгъэхэр си гукъы­дэжым елъытауэ, зэры­мы­щIэкIэ езыр-езыру къэзгъэ­щIащ. Зы псэупIэ гуэрым къытесщIыкIа зы ухуэныгъи абы яхэткъым. Пасэ-рей унэхэр къыщыгъэлъэгъуа сурэт куэд сиIэщ, ауэ лэжьыгъэхэр абыхэм къатесщIыкIакъым. А архитектурэхэр си гупсысэщ къызыхэсхар. СызыхущIэкъур нэхъапэм щыIа унэхэм яIа теплъэр зэ­ры­щыта дыдэм хуэдэу къэзгъэлъэгъуэжыныркъым, атIэ а ухуэныгъэхэм я ху­а­багъэр, щыIэкIар, щы­ты­кIар цIыхухэм я деж нэс­хьэсынырщ, - жеIэ Битокъу Владислав.
СурэтыщIым зэрыжиIэмкIэ, ар зэгуэр Тбилиси щыIащ икIи пасэрей къалэм щилъэгъуа унэжьхэр телъыджэ щыхъуащ. Тригъэзэжынуи и хъуэпсапIэт, нэхъ набдзэгубдзаплъэу ахэр зэпиплъыхьыну, иджы­ну, арщхьэкIэ пандемием зэкIэ апхуэдэ Iэмал къритыркъым.
- Хуит сащIамэ, Налшык къалэм и кур зэрыщыту Тбилиси и псэупIэхэм ещхьу сыухуэнт, - жеIэ Владислав. - Къат куэду зэтет унэхэр къалэ гъунэм згъэ­Iэпхъуэнт, сыту жыпIэмэ ахэр теплъаджэщ, унэ цIы­кIухэр гум къыподжэж, ­хуабагъэкIэ гъэнщIащ. 40 - 50 гъэхэм яухуа унэ за­къуэтIакъуэхэр зым и ужь адрейр иту зэракъутэжыр ди нэгу щIокI.
Битокъу Владислав зэрысабийрэ сурэт щIыным дехьэх. Ар я гъэсэнщ художник цIэрыIуэ Ткаченкэ Андрейрэ Налшык и Сабий художественнэ школыр къы­­зэIузыха икIи и уна­фэщIу щыта Вуколовэ ­Люд­милэрэ. Абы ­КъБКъУ-м и инженер-техникэ факультетыр къиухащ. 90 гъэ­хэм ар «Газета Юга» къы­дэ­кIы­гъуэм и редакцэм и художникыу, иужькIэ и сурэттехыу щытащ.
Выставкэм зрагъэ­хьэ­лIащ жылагъуэ, творческэ, хъыбарегъащIэ IуэхущIапIэхэм я лэжьакIуэхэм.