«Белгиленнген проектлени былтырдан да тынгылы толтурургъа тийишлиди»

Быйыл биринчи «муниципал сагъатда», КъМР-ни Башчысы Казбек Коков а быллай тюбешиулени айгъа эки кере бардырады,  санитар-эпидемиология  хал тинтилгенди, муниципалитетледе коронавирусха къажау вакцинация къалай къуралгъаны эмда федерал эм республикалы проектле бла программала жашауда къалай толтурулгъанлары  сюзюлгенди.
 Кенгешге КъМР-ни Правительствосуну башчысы Мусукланы Алий,  премьер-министрни биринчи орунбасары Муаед Кунижев, Правительствону башчысыны орунбасары Марат Хубиев, къурулуш эм ЖКХ министр Алим Бербеков, транспорт эм жол мюлк министр Аслан Дышеков, саулукъ сакълау министр Рустам Калибатов, муниципал районланы бла шахар округланы администрацияларыны таматалары къатышхандыла.
Коронавирус ауруу жайылгъаныны юсюнден айта, Казбек Коков къырал, муниципал организациялада къууанчлы жыйылыуланы бардырыугъа чек салыннганыны эмда республикада халкъны асламы профилактика мадарланы сакълагъанларыны хайырындан байрамладан сора ауругъанланы саны артыкъ бек ёсмегенин белгилегенди.  Болсада хал алыкъа тынчайырча тюйюлдю. Ауругъанланы санын азайтыргъа жаланда вакцинация болушуругъун чертгенди ол. Аны бла байламлы республиканы оноучусу муниципалитетлени таматаларын бу ишни къуралыулу бардырыргъа чакъыргъанды.
Власть органланы халкъгъа дарман салыу жаны бла ишлерин бирге келишдирген правительстволу комиссиягъа башчылыкъны Марат Хубиев этериги тохташдырылгъанды.   Рустам Калибатовну айтханына кёре, бюгюнлюкде 1342 инсан дарманны салдыргъандыла, аладан 572-сине уколну экинчи бёлюмю этилгенди.  Республикагъа энтта дарманны 1442 дозасы келтирилгенди. Жамауатны асламы уа аны  салдырыргъа сюйгенлерин билдиргендиле. 19 январьдан башлап вакцина битеу ара район больницалада бла амбулаториялада салдырылады. Узакъ элледе жашагъанланы  медицина учреждениялагъа жетдириу иш къуралгъанды, дагъыда вакцинаны жерине барып этген къауумла да бардыла.  
- Биз алгъын жашаугъа, экономиканы айнытыугъа бу ишни не къадар терк, бир тюрлю чырмаусуз къурагъаныбызгъа кёре къайтырыкъбыз,-дегенди Казбек Коков.
 Республикада федерал эм регион проектле бла программала жашауда къалай бардырылгъанларыны юсюнден докладны Мусукланы Алий этгенди. Аны айтханына кёре, 2020 жылда проектледе белгиленнген кёрюмдюле барысы да тамамланнгандыла. Быйыл а республикада быллай регион проектле толтуруллукъдула: «Хар сабийни да жетишими», «Культура хал», «Чыгъармачы адамла», «Ырахматлы шахар болумну къурау», «Жашау этерге жарамагъан фондну къысхартыу».  Социал объектле ишлетилликдиле эм  жангыртыллыкъдыла, элледе инфраструктура тапландырыллыкъды.
Премьер-министр билдиргенича, муниципалитетлеге субсидияла берилгендиле, алай бла проектлени тамамлап башларгъа онг барды. Муниципалитетлени башчыларына жууаплы министерствола бла хайырлы байламлыкъла къураргъа кереклиси эсгертилгенди.
- Миллет проектлени тамамлауну тохтатыргъа жарамайды.  Районланы бири къалмай барысында  да социал объектни ишлетирге, неда жангыртыргъа мурат барды. Биз белгиленнген жумушланы былтырдан да хайырлы толтурургъа борчлубуз,-дегенди ахырында Казбек Коков.

КъМР-ни Башчысыны бла Правительствосуну пресс-службасы.

Поделиться:

ЧИТАТЬ ТАКЖЕ:

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.

28.03.2024 - 09:03

ИНВЕСТИЦИЯЛАГЪА – ЭНЧИ ЭС

Жангы предприятияла къурарча, производствону кенгертирча, инвестицияла этмей, башхача айтханда ишге ахча салмай боллукъ тюйюлдю.

27.03.2024 - 14:04

КЪАБАРТЫ-МАЛКЪАР РЕСПУБЛИКАНЫ БАШЧЫСЫ К.В.КОКОВНУ РОССЕЙ ФЕДЕРАЦИЯНЫ МИЛЛЕТ ГВАРДИЯСЫНЫ АСКЕРЛЕРИНИ КЮНЮ БЛА АЛГЪЫШЛАУУ

Росгвардияны Къабарты-Малкъар Республикада Управлениясыны хурметли аскерчилери, ишчилери эмда ветеранлары! Сизни Россей Федерацияны Миллет гвардиясыны аскерлерини кюню бла алгъышлайма!

27.03.2024 - 09:07

САКЪАТ САБИЙЛЕ ОКЪУУСУЗ КЪАЛМАЗЧА

Къабарты-Малкъарны Жамауат палатасында республиканы билим бериу учреждениялада сакъат эм къыйын ауругъан сабийлени окъутуу не халда болгъаны тинтилгенди.