Казбек Коков Къабарты-Малкъарны Башчысында Стратегия айныу эмда миллетлени проектлери жаны бла советни жыйылыуун бардыргъанды. Анда быйылны биринчи жарымында миллет проектле къалай толтурулгъанларына, коронавирус жайылмаз ючюн этилген мадарла не хайыр бергенлерине къаралгъанды, жууукъ заманнга эмда 2030 жылгъа дери стратегия борчла салыннгандыла, макроэкономика эмда социал политиканы баш магъаналы ишлери тохташдырылгъандыла.
Жыйылыуда жангы жукъгъан ауруу бла байламлы салыннган чекле Къабарты-Малкъарны экономикасына бла социал бёлюмюне хата салмай къалмагъанларыны, алай дагъыда бёлюмледе иш бек осалына кетмезча этерге къолдан келгенини, ол санда АПК-да, къурулушда иш тохтамагъаны, миллет проектлени толтуруу андан ары бардырылгъаны да белгиленнгенди.
Аны бла бирге сатыу-алыуда, халкъгъа хакъ бла жумушла тындырыуда, туризмде экономика кёрюмдюле энишге тюшмей къалмагъандыла, ишсизлени саны да ёсгенди.
-Коронавирус инфекциягъа къажау сюелир мурат бла сингдирилген къаты мадарла къыралны битеу субъектлеринде да болумну тюрлендиргендиле. Бир-бир жерледе кемчиликле олсагъат башына чыкъгъандыла, башхалада жангы онгла ачыкъланнгандыла. Битеу бирге уа пандемия болгъан ырысхыны бютюн къыйматлы хайырланыргъа, белгиленнген ишлеге бла борчлагъа жангыдан къарап тюзетирге керек болгъанын кёргюзтгенди,-дегенди КъМР-ни Башчысы.
Аны юсюнден Стратегия айныу эмда миллет проектле жаны бла советни 13 июльда болгъан жыйылыуунда РФ-ни Президенти Владимир Путин да айтханын эсгертгенди Казбек Коков. Къырал башчыны 2020 жылда 21 июльда чыгъарылгъан Указында уа къыралны 2030 жылгъа дери айнытыуну миллет борчлары эмда шарт кёрюмдюле салыннгандыла. Ал жанында - халкъны санын ёсдюрюудю, саулугъун игилендириудю, ырахат жашау бла жалчытыуду. Къалгъан жумушла да ма бу баш магъаналы борчну толтуруугъа бурулупдула.
-Жууукъ заманлада бизге республиканы айнытыу бла байламлы документлени заманнга кёре тюзетиу жаны бла уллу иш бардырыргъа тюшерикди. Ол санда миллет проектлеге кёре белгиленнген кёрюмдюлени, бюджет планны жарашдырыуну да тюрлендирирге керек боллукъду»,-дегенди Казбек Коков. Аллай иш федерал министерствола, жер-жерли самоуправленияны органлары бла къаты байламлыкъда бардырылыргъа эмда тохташдырылгъан болжаллада бошалыргъа керекди, деп къошханды ол.
Баш магъаналы ишлени юслеринден айта, Казбек Коков аланы араларында билим бериуню качествосун кётюрюуню, илмуну айнытыуну, фахмулу сабийлени бла жаш тёлюню ачыкълауну, алагъа болушууну, кадрланы хазырлауну эмда жангыдан юйретиуню энчи белгилегенди. «Аны бла келир заманны, адам улуну къайгъысын кёребиз. Олду бизни бек уллу байлыгъыбыз. Билим бериу - айныуну эмда жетишимлени жолу болгъанына ишексизме. Бюгюнлюкде, битеу дунияда да информация эмда илму-технология айныу алгъа терк баргъан заманда, социал бёлюмде бла экономикада билим бютюн уллу магъананы тутады»,-дегенди республиканы оноучусу.
Бек алгъа тамамланыллыкъ борчладан бирлерине уа была саналадыла: инсанларыбызны саулукъларын сакълау, медицинаны айнытыу, КъМР-ни хар шахарында бла элинде физкультура эмда спорт бла не къадар кёп адам кюреширча мадарла этиу. КъМР-ни Башчысы бюгюнлюкде жашау журтла бла байламлы къытлыкъны кетериу, общежитледен адамланы кёчюрюу дегенча магъаналы жумушланы тамамларгъа кереклисин да къошханды. «Кёплени башларын сугъар жерлери болмай тургъанда, халкъны ырахатлыгъыны юсюнден айтыр кереклиси бармыды?»,-дегенди ол.
