Миллет проектлеге къатышыуну хайыры бла быйыл Нальчикде аслам иш этиле барады. Шахарны администрациясында айтханларына кёре, анга битеу да 48 объект киреди. Бу кюнледе мэр Таймураз Ахохов, аланы хар биринде да болуп, ишле къалай баргъаны бла шагъырейленнгенди.
«Шахарда тап болум къурау» деген Миллет проектни чеклеринде Адмирал Головко атлы скверни эмда 33-чю номерли орта школну къатында энтта да аллай бир объектни къурау башланнганды. Аны бла бирге кёп фатарлы юйлени алларында 25 арбазны да тап халгъа келтирликдиле.
«Къоркъуусуз эмда качестволу автомобиль жолла» Миллет проект бла Канукоев, Киров, Шогенцуков, Фурманов, Мусов атлы орамлада аслам мадар этиле барады. Алгъаракъда билдиргенибизча, бу проектле тынгылы эм заманындан алгъа бардырылгъанлары себепли къырал энтта да юч жюз миллион чакълы сом бергенди. Анга уа быйылны ахырына дери Тлостанов, Мальбахов, М. Вовчок, Мовсисян эм Иллазаров атлы орамла жангыртыллыкъдыла.
Келир жыл башланнгынчы шахар округда энтта да беш кёп функциялы сабий майдан къураргъа керекди. Ол кеси да «Демография» Миллет проектни хайыры бла боллукъ ишди. Объектле 1 эм 14 номерли гимназияланы, 17 эм 30 номерли орта школланы къатларында, Надречная орамда, Адиюх элде эмда Нарткалинское шосседе орнатыллыкъдыла. Къурулушчула ишлени барын да сентябрьге дери бошаргъа умутлудула.
Шахар округну тийресинде суу быргъыладан алты километр чакълысын орнатыу барады. Дагъыда аны бла бирге 18 минг кубометр таза суу жыйгъан эки резервуар да боллукъду. Бу иш «Жашау журт» деген федерал энчи программаны хайыры бла тамамланады.
Жаш къараучуну театрына тынгылы ремонт этиу «Культура» миллет проектни чеклеринде барады. Аны хайыры бла дагъыда юч сабий чыгъармачылыкъ школ да жангыртыллыкъдыла. И. Арманд орамда орналгъан учреждение октябрьде битерикди, къалгъан экиси уа хайырланыугъа сентябрьде берилликдиле.
Республиканы кесини «Культура» программасыны чеклеринде Хасанияда Маданият юйге ремонт этиле турады. Мэрияда айтханларына кёре, анда хар неда быйыл сентябрьге хазыр боллукъду.
