Иджыблагъэ Канны щекIуэкIа дунейпсо кинофестивалым и «Особый взгляд» программэм режиссёр лэжьыгъэ нэхъыфIу къыщалъытащ адыгэ щIалэ Бэлагъы Къантемыр и «Дылда» кинофильмыр.
Езы Къантемыр а зэхыхьэм кIуэфакъым. Фильмым и продюсер Роднянский Александр саугъэт лъапIэр къыщратым, Бэлагъым теухуауэ псалъэ гуапэ куэд жиIащ.
- Мы саугъэтыр Къантемыр езым къыIихыжыну хуэфащэт, ауэ, Iуэху къылъэкъуэкIри, Москва имыгъэзэжу хъуакъым. Абы и ныбжьыр илъэс 27-рэ хъуауращи, и фильмым саугъэт лъапIэхэр Канны къыщехь. Режиссёр ныбжьыщIэм 2017 гъэм и япэ лэжьыгъэр - «Теснота» фильмыр - Канны утыку къыщрихьэри, ФИПРЕССИ саугъэтыр къратат. Бэлагъыр Кавказым хыхьэ Налшык къалэ щыщщ. Ар и гъэсэнщ куэдым фIыуэ яцIыху режиссёр цIэрыIуэ Сокуров Александр. Сэ быдэу си фIэщ мэхъу езы щIалэщIэр нобэ мы утыкум си гъусэу итамэ, и егъэджакIуэм, къыдэлэжьа гупым фIыщIэ зэрахуищIынур. АдэкIи ефIэкIуэну си гуапэщ.
«Дылда» фильмым лъабжьэ хуэхъуар Алексиевич Светланэ и «У войны не женское лицо» тхылъырщ. Ар теухуащ зауэм къикIыжу Ленинград къэкIуэжа хъыджэбзхэр мамыр гъащIэ яухуэну зэрыхущIэкъум. ЛIыхъужь нэхъыщхьэхэм я ролхэр зыгъэзэщIар Мирошниченкэ Викториерэ Перелыгинэ Василисэрэщ.
«Особый взгляд» Iыхьэм и къэпщытакIуэ гупым я тхьэмадэу щытар Ливаным щыщ режиссёр Лабаки Надинщ, абы и гъусащ Аргентинэм къикIа режиссёр Алонсо Лисандрэ, франджы актрисэ Фоис Маринэ, Бельгием щыщ режиссёр Донт Лукас, нэмыцэ продюсер Шекерджи-Порст Нархан.
Фильмыр мэкъуауэгъуэм и 20-м ди къэралым щагъэлъэгъуэну я мурадщ.
